ایران د افغان وګړو د ویزې د ساده کولو پر هڅو خبر ورکړ

ایران د افغانستان د وګړو د ویزې په ساده کولو د هڅو خبر ورکړ. د ایران د سفارت مرستیال سید حسین مرتضوي د هرات له والي شیخ مولوي اسلام‌جار سره په لیدنه کې د دواړو هېوادونو د اړیکو د پراختیا، د کډوالو د ستونزو د حل او د سوداګریزو همکاریو د اسانتیا پر موضوعاتو بحث وکړ. د هرات د ولایت مقام په اعلامیه کې راغلي چې مرتضوي د ایران د تعهد یادونه وکړه او ویې ویل چې د افغانستان د وګړو د ویزې د صادریدو د ساده او منظم کولو پروسه د دې هېواد د دیپلوماتیکو استازولیو له لومړیتوبونو څخه ده. هرات والي د افغان کډوالو د ستونزو د ارزښت په یادولو سره له اړوندو ایرانی ادارو وغوښتل چې د افغان وګړو د ویزې په برخه کې پریکړې چټکې او اسانتیاوې زیاتې کړي. هغه وویل چې دا عملي همکاري کولی شي د اوسنیو فشارونو د کمېدو لامل شي. نوموړي د طالبانو د ادارې د دریځ یادونه وکړه او زیاته یې کړه چې دا اداره غواړي له ایران سره پیاوړي او دوامدارې اړیکې ولري. هغه د سوداګرۍ، ترانزیت او د دواړو هېوادونو د وګړو د چارو په برخه کې اسانتیاوې د ګډو ګټو لپاره ګټورې وبللې. همدارنګه، د ایران قونسل جنرال علیرضا مرحمتي څرګنده کړه چې د هغو افغان کډوالو قضیه چې د ایران په پوله وژل شوي، د دغه هېواد عدلي او قضایي بنسټونو ته سپارل شوې ده، او د پېښې اسناد او شرایط به په بشپړه توګه وڅېړل شي.