امنیت او پېښېمهم خبرونه
په پنجشېر کې د طالبانو د استخباراتو يو غړی نيول شوی
د پنجشېر ولايت ځايي سرچينې وايي، د طالبانو اداره په دې ولايت کې د خپل د استخباراتو يو غړی نيولی دی. د سرچينو د معلوماتو له مخې، نيول شوی کس ميرآغا نوميږي او د پنجشېر اوسېدونکی دی.
سرچينو زياته کړې چې دا نيونه د طالبانو د استخباراتي جوړښت دننه ترسره شوې، خو تر اوسه د دې پېښې د علت، وخت او څرنګوالي په اړه معلومات نه دي څرګند شوي. د رسمي مالوماتو نشتوالی د دې ادارې د امنيتي چارو د روڼتيا په اړه پوښتنې راپورته کړي دي.
د طالبانو اداره تر د دې راپور د خپرېدو د وخت پورې د دې استخباراتي غړي د نيول کېدو په اړه هېڅ غبرګون نه دی ښودلی او له رسنيو سره يې نور جزئيات نه دي شريک کړي. دا چوپتيا په داسې حال کې دوام لري چې پنجشېر تل د سختو امنيتي تدابيرو او پراخو محدوديتونو شاهد پاتې شوی دی.
