عبدالغنی برادر له نړیوالو وغوښتل چې له افغانستان سره اړیکې پراخې کړي
د طالبانو د رییسانو د ریاست اقتصادي مرستیال عبدالغني برادر، د شنبې په ورځ په بلخ ولایت کې د یوه تجارتي مارکېټ د پرانیستې په مراسمو کې، له نړیوالو هېوادونو وغوښتل چې پر افغانستان د بندیزونو او هغه څه چې نوموړي یې ‘بې ځایه فشارونه’ وبلل، پر ځای باید له افغان حکومت سره خپلې اړیکې پراخې کړي.
نوموړي په مزارشریف ښار کې په دې مراسمو کې ادعا وکړه چې د افغانستان اقتصادي پیاوړتیا نه یوازې د سیمې او نړۍ د هېوادونو لپاره زیان نه لري، بلکې کولی شي د نورو هېوادونو له هوساینې او ثبات سره هم مرسته وکړي. برادر ټینګار وکړ چې د طالبانو اداره د سیمې او نړۍ له اقتصادي او سیاسي همکاریو سره لېوالتیا لري، خو دا د متقابل احترام له اصله باید برخمنې واوسي.
د رییسانو د ریاست اقتصادي مرستیال زیاته کړه چې د طالبانو ادارې له خصوصي سکتور سره په اوږدمهالو او لویو پروژو کې، په ځانګړي ډول د عامه او خصوصي مشارکت د قراردادونو له لارې همکاري ښيي چې د ده په وینا دا د دې لپاره زمینه برابروي چې کورني او بهرني پانګهوال په افغانستان کې پانګونه وکړي. سره له دې، ډېر پانګهوال د شفافیت، حقوقي تضمینونو او سیاسي ثبات د نه شتون له امله افغانستان ته د پانګونې پر وخت لا هم احتیاط کوي.
د ورکړل شويو معلوماتو پر بنسټ، دا اتاړه پوړیز تجارتي مارکېټ به د ارشاد، حج او اوقاف وزارت پورې اړوند په ۶۰۰ متره مربع ځمکه کې جوړ شي، چې ۸۷۰ دوکانونه، څلور رستورانتونه، یوه مېلمهخانه، یوه جومات او د موټرو د درولو پارکینګ به ولري. د دې پروژې لګښت ۷۴۳ میلیونه افغانۍ ښوول شوی او ټاکل شوې چې په دوو کلونو کې به بشپړه شي.
د طالبانو اداره وایي چې له دې پروژې څخه به هر کال شاوخوا ۴۳ میلیونه افغانۍ د اجارې په ډول د دولت خزانې ته انتقالېږي. سره له دې، اقتصادي کارپوهان ټینګار کوي چې یواځې عمراني یا ودانیزې پروژې نشي کولای د بنسټیزو اصلاحاتو او له نړیوالو سره د باور جوړونې ځای ناستي شي.
د عبدالغني برادر دا څرګندونې پر داسې مهال کېږي چې تر دې مخکې، د نړۍ ګڼ شمېر هېوادونه، په ځانګړي ډول د افغانستان ګاونډیان، له دې کبله اندېښنه ښودلې چې د افغانستان له خاورې د امنیتي ګواښونو او ترهګریزو فعالیتونو کچه لوړه شوې. دا اندېښنې د طالبانو له ادارې سره د عادي اړیکو پر لور یو له اصلي خنډونو ګڼل کېږي.
تر اوسه نږدې څلور نیم کاله وروسته له هغه چې طالبان بیا واک ته رسېدلي، د روسیې پرته، اکثرو نړیوالو هېوادونو د طالبانو اداره په رسمیت نه ده پېژندلې؛ یوه مسله چې د افغانستان تجارتي لارو، پانګونو او نړیوال مالي نظام ته د لاسرسي محدودیتونه رامنځته کړي.
نړیوالې ټولنې بیا بیا ویلي چې له ترهګرۍ او نشهيي توکو سره مؤثره مبارزه، د بشري حقونو—په ځانګړي ډول د ښځو د حقونو—رعایت، او یو داسې ټولشموله حکومت جوړول چې د ټولو سیاسي خوځښتونو او اقشارو استازیتوب وکړي، د طالبانو د رسمیت پېژندنې او له دوی سره د اړیکو پراخولو لپاره بنسټیز شرطونه دي.
