ټرمپ: د اوکراین جګړې پای ته رسېدو وخت رارسېدلی
د امریکا ولسمشر ډونالډ ټرمپ یو ځل بیا ویلي، چې د اوکراین جګړې د ختمېدو شرایط برابر شوي او ښکېل اړخونه د پخوا په پرتله سولې ته ډېر نژدې شوي دي. نوموړي د خبرو اترو له ورو پرمختګ څخه نیوکه وکړه او له اوکراینه یې وغوښتل، چې ژر تر ژره د کړکېچ د سولهییز حل لپاره اقدام وکړي.
ټرمپ هیله څرګنده کړه چې یوه چټکه حللاره ته رسېدل ممکن دي او دا چې اوس د جګړې د پای ته رسېدو مناسب فرصت شته، خو که کیف پاتې راتلل وکړي نو ښایي دا فرصت له لاسه ووځي. ده ټینګار وکړ، چې د مذاکراتو دوامداره ځنډ کولی شي د سولې د بهیر لپاره منفي پایلې ولري.
د امریکا ولسمشر همداراز وویل، چې ښایي له د اسراییلو له لومړي وزیر بنیامین نتانیاهو سره وویني. ده زیاته کړه چې نتانیاهو د دې لیدنې غوښتنه کړې او تمه کېږي دغه ناسته په فلورېډا ایالت کې تر سره شي. ټرمپ وویل، که څه هم لا تر اوسه د دې لیدنې رسمي مهالویش نه دی جوړ شوی، خو دی د مېلمه پالنې هوډ لري.
ټرمپ په نورو خبرو کې څرګنده کړه، چې اړتیا نه ویني څو د ونزویلا پر ضد تر احتمالي برید مخکې کانګرس خبر کړي، ځکه دا موضوع مخکې لا تایید شوې، خو دا هم ویې ویل چې که د ځمکني برید خبره وي، د کانګرس خبردارولو ته کومه ستونزه نه لري.
نوموړي د غزې اوربند د منځني ختیځ د سولې لپاره یو لوی پرمختګ وباله او د مصر له ولسمشر عبدالفتاح السیسي سره د لیدنې هیله هم څرګنده کړه، او ویې ویل، چې دی غواړي هغه ته کوربه توب وکړي.
د ټرمپ حکومت له هغې وروسته چې بیرته سپینې ماڼۍ ته راستون شو، د اوکراین جګړې پای ته رسول د امریکا د بهرنۍ پالیسۍ له اساسي لومړیتوبونو څخه اعلان کړل او په وروستیو میاشتو کې یې له ښکېلو خواوو سره د دیپلوماتیکو لارو د فعالولو هڅې پیل کړې دي. خو، د کیف لخوا د خبرو اترو د بهیر ورو حرکت د ټرمپ له نېغې نیوکې سره مخ شوی دی.
