د کنړ په دانګام کې د طالبانو او پاکستاني ځواکونو تر منځ مرزي نښته شوې
په کنړ ولایت کې سیمهییزو سرچینو ویلي چې د شورو (چهارشنبې) په ورځ د غرمې په شاوخوا ۱۲ بجو، د طالبانو د ځواکونو او پاکستاني سرحدي ځواکونو تر منځ په دانګام ولسوالۍ کې د ډیورند کرښې په اوږدو کې نښته شوې ده.
د دغو سرچینو د معلوماتو له مخې، نښته هغه مهال پیل شوه کله چې پاکستاني ځواکونو د کنړ اړوند سیمو ته توغندي وویشتل. له دې وروسته، دواړو لورو یوبل ته ډزې وکړې چې دا تبادله تر یوه وخته روانه وه.
سیمهییزې سرچینې ټینګار کوي چې دا نښته اوس بنده شوې، خو تر دې دمه د بشري تلفاتو یا مالي زیانونو په اړه هیڅ باور وړ معلومات شتون نه لري.
سره له دې چې دا پېښه حساسه ده او د سرحدي سیمو اوسېدونکي یې په اړه اندېښمن کړي، خو د طالبانو او پاکستان چارواکو تر دمه د نښتې د لامل او پایلو په اړه کوم رسمي توضیحات نه دي ورکړي؛ یو سکوت چې یو وار بیا د سرحدي شخړو د مدیریت په برخه کې د شفافیت د نشتوالي نیوکې راپورته کړي دي.
