د پاکستان لومړی وزیر د افغانستان په شمال کې د زلزلې قربانیانو سره خواخوږي څرګنده کړې
د پاکستان لومړی وزیر شهباز شریف د ټولنیزې شبکې ایکس (پخوانی ټویټر) له لارې یوه پیغام خپور کړی او د افغانستان په شمال کې د یوې وژونکې زلزلې له امله خپله خواشیني څرګنده کړې. نوموړي د زلزلې قربانیانو له کورنیو سره خواخوږي کړې ده.
دا غبرګون د دوشنبې په ورځ، د لړم په ۱۲مه، هغه څو ساعته وروسته څرګند شو چې یوه ۶.۳ درجې ریشتر زلزله د افغانستان د شمال ولایتونو ولړزول؛ پېښه چې ګڼو خلکو ته یې مرګژوبله واړوله.
د طالبانو تر ادارې لاندې د عامې روغتیا ریاست خبر ورکړی چې په دې طبیعي پېښه کې لږ تر لږه ۲۰ کسان وژل شوي او ۵۳۴ نور ټپیان شوي دي. دا شمېرې که څه هم له رسمي سرچینو ورکړل شوې، خو له خپلواکو تصدیق شویو سرچینو پرته دي، نو له ځینو شکونو سره هم مخ دي.
شهباز شریف په خپل پیغام کې ویلي: «پاکستان په دې سختو شېبو کې د افغان ورونو او خویندو سره یووالی ښيي.» سره له دې چې دا د خواخوږۍ پیغام پر ټولنیزو رسنیو خپور شو، خو لا هم د زیانمنو شویو سیمو ډېر اوسېدونکي له فوري او اغیزمنو مرستو بې برخې پاتې دي.
اوس مهال د دغو سیمو خلک د درملنې، سرپنا او اساسي خدماتو له کمښت سره مخ دي. که څه هم طالبان د اړمنو کسانو لپاره د ضروري خدمتونو د برابرولو مسؤلیت لري، خو دوی نه دي توانېدلي چې د بحران پر وړاندې فوري او اغېزمن غبرګون وښيي — یوه ستونزه چې د خلکو اندېښنه او غوصه یې راپارولې ده.
