په کنړ کې د زلزله ځپلو لپاره د کورونو او جومات جوړولو کار پيل شو
د ملي دفاع وزارت ويلي چې د کنړ ولايت د نورګل ولسوالۍ په «دره مزار» سيمه کې د ۳۵ استوګنيزو کورونو او يو جومات د جوړولو کار پيل شوی دی. د دې وزارت د معلوماتو له مخې، د يادې پروژې ټول لګښت ۳۳.۵ ميليونه افغانۍ اټکل شوی، او موخه يې د هغو کورنيو لپاره د سرپناه برابرول دي چې په وروستۍ زلزله کې يې خپل کورونه له لاسه ورکړي دي.
د وزارت چارواکي وايي، دا برنامه د زلزله ځپلو د ژوند حالت د ښه والي او ملاتړ په موخه طرحه شوې ده. خو ځايي څارونکي وايي، د طالبانو تر ادارې لاندې سیمو کې د بيا رغونې بهير ورو روان دی، او لا هم ډېر خلک په خيمو يا ناسم او غير خوندي ځايونو کې ميشت دي.
طالبان په وروستيو مياشتو کې د هیواد په بېلابېلو برخو کې د بيا رغونې د پروژو د پلي کېدو خبر ورکړی، خو ځايي سرچينې او داخلي کډوال په دوامداره توګه د مرستو د وېش پر مهال د شفافيت نشتون او ځنډونو شکايت کوي.
د بيا رغونې کارپوهان ټينګار کوي چې بايد د خپلواکو بنسټونو او ځايي ژغورل شويو کسانو له لوري د دغو پروژو پر پلي کېدو څارنه زیاته شي، څو دا یقیني کړل شي چې مرستې رښتیا هم مستحقو کسانو ته رسيږي.
