په کاپیسا کې د طبیعي پېښو پر ضد د مبارزې ریاست ته نوې ودانۍ پرانستل شوه
په کاپیسا ولایت کې د طبیعي پېښو پر ضد د مبارزې ریاست لپاره نوې ودانۍ پرون رسماً ګټې اخیستنې ته وسپارل شوه. د یادې ادارې رئیس مولوي محمد صابر وایي، دا ودانۍ په ۳۶۴ متره مربع مساحت کې په درېیو پوړونو جوړه شوې او د جوړولو لګښت یې ۱۳ میلیونه افغانۍ دي، چې دا پیسې د طبیعي پېښو د مبارزې ملي ادارې له بودجې تمویل شوي دي.
یاده ودانۍ ۱۲ خونې لري او د کار جریان یې په شپږو میاشتو کې بشپړ شوی دی. رئیس زیاته کړه چې د دې ودانۍ په افتتاح سره د کارکوونکو د کار زمینه اسانه شوې او هغه ستونزې چې د مناسب ځای د نشتوالي له امله وې، حل شوې دي.
له دې مخکې، د کاپیسا د طبیعي پېښو پر ضد د مبارزې ریاست په یوه کرايي ځای کې فعالیت درلود، چې له محدود ځای او امکاناتو سره مخ و. سیمهییز چارواکي وایي، په تېرو میاشتو کې په پنځو ولایتونو کې په ګډون د کاپیسا لپاره، د ورته ریاستونو لپاره نوې ودانۍ جوړې شوې دي.
باوجود د دې پرمختګونو، محلي ناظران وایي طالبان باید د طبیعي پېښو د مخنیوي او اقلیمي پېښو ته د چمتووالي په برخه کې زیاته پاملرنه وکړي؛ ځکه چې یوازې د ودانیو جوړول که له مؤثر پلان جوړونې پرته وي، د بحران پر مهال د خلکو اړتیاوو ته ځواب نه شي ویلی.
