هندي دیپلومات: د کابل او اسلاماباد ترمنځ د ګټو واټن بېسابقه شوی
د هند پخواني بهرنیو چارو وزیر شاشي تارور د طالبانو تر واک لاندې ادارې او د پاکستان حکومت ترمنځ د اړیکو اوسنی وضعیت ارزولی او ویلي یې دي چې د دواړو خواوو ترمنځ د ګټو تضاد بېسابقه کچې ته رسېدلی، چې دا چاره د افغانستان او پاکستان ترمنځ د یوې تلپاتې شراکت هیله ډېره کمه کړې ده.
تارور ویلي، سیاسي او امنیتي اتحادونه هغه مهال دوام مومي چې ملي ګټې سره همغږي وي، خو د کابل او اسلاماباد ترمنځ اوسنۍ اړیکې کې دا همغږي نه ترسترګو کېږي، بلکې برعکس، متضادې ګټې د همکارۍ مخه نیسي.
نوموړي زیاته کړې چې د هر هېواد ملي ګټې، نه لنډمهاله سیاسي ژمنې یا تاکتیکونه، د دولتونو اصلي جهت ټاکي، نو له همدې امله د افغانستان او پاکستان ترمنځ د بشپړې همغږۍ تمه واقعبینانه نه ده.
تارور یادونه کړې چې د پاکستان حکومت له څو لسیزو راپدېخوا له طالبانو څخه ملاتړ کړی او هغوی یې د هند پر وړاندې د یوه فشار او ستراتیژیک ژورېدو وسیله بللي. خو د طالبانو له راتګ وروسته، دغه اداره د پاکستان د هیلې سره سم نه ده عمل کړې او اوس کله ناکله د اسلاماباد لپاره یو ستونزمن عنصر ګرځېدلې.
تارور د کابل او اسلاماباد ترمنځ د اړیکو خړې پړې کېدو ته ځینې نښې نښانې هم اشاره کړې، لکه دا چې د طالبانو اداره د کشمیر وروستی برید غندلی او د تحریک طالبان پاکستان د غړیو د نیولو په برخه کې له پاکستان سره له همکارۍ ډډه کړې.
نوموړي پایله اخیستې چې طالبان اوس یو داسې لوبغاړی دي چې خپلې ځانګړې لومړیتوبونه لري او د اسلاماباد د سیاستونو بشپړ متحد نه شمېرل کېږي.
دغه هندي دیپلومات دا هم خبرداری ورکړی چې د افغانستان او پاکستان ترمنځ پر ګډو پولو د اختلاف زیاتېدل، سربېره پر دې چې تحریک طالبان پاکستان هم فعالیتونه لري، ښايي سیمه نوو ناامنيو ته ووهي. د هغه په وینا، دا بحران نه یوازې د کابل او اسلاماباد اړیکې له خطر سره مخ کوي، بلکې د هند او چین په څېر سیمهییز طاقتونه پر امنیتي وضعیت هم اغېز لرلای شي.
