د ملګرو ملتونو انکشافي پروګرام د افغانانو د معیشتي وضعیت د ښه کېدو لپاره همکاري کوي
د ملګرو ملتونو انکشافي پروګرام (UNDP) اعلان کړی چې له افغان ولس سره ولاړ دی څو د هغوی د ورځنیو ستونزو لپاره عملي او د انسان پر محور تمرکز لرونکي حللارې ولټوي. د دې نړیوال سازمان همکاري له هېوادوالو سره په بېلابېلو سیمو کې درې مهمې حمایوي برخې رانغاړي؛ هغه ملاتړونه چې موخه یې د کورنیو ژوند بېرته رغول او د اوږدمهاله سمون بهیر پیاوړی کول دي.
د دې پروګرام مسوولین وایي، د دوی د فعالیتونو اساسي تمرکز د سیمه ییزو ټولنو توانمندول او د بحران او بېثباتۍ نه وروسته د تلپاتې ژوند لپاره زمینې برابرول دي. د فقر کموالی، اقتصادي ظرفیت لوړول او ابتدایي خدماتو ته لاسرسی د دې ملاتړونو اصلي محورونه بلل شوي دي.
پر داسې مهال چې په افغانستان کې اقتصادي وضعیت ورځ تر بلې خرابېږي او د طالبانو اداره د خلکو د بنسټیزو اړتیاوو په پوره کولو کې پاتې راغلې، د UNDP په څېر نړیوالو بنسټونو رول ځانګړی اهمیت موندلی دی. د نړیوالو مرستو بندېدل او د طالبانو له خوا لګول شوې محدودیتونه بیا د افغانانو لپاره د نړیوالې ټولنې د همکارۍ اړتیا روښانه کړې ده.
د ځينو ولایتونو اوسیدونکو رسنیو ته ویلي چې د UNDP پروژې د دوی لپاره لږ تر لږه هیله پیدا کړې او د بیا رغونې بهیر یې تر یوې اندازې چټک کړی دی. خو د طالبانو ادارې له لوري د دغو پروګرامونو پوره ملاتړ نهکېدل، د هغو پوره پلي کېدو ته نوې ننګونې رامنځته کړي دي.
