امریکايي چارواکي: رحمانالله لکنوال افراطي فکرونو ته مایل شوی و
د امریکا د کورني امنیت وزیرې، کریستی نوئم، تایید کړې چې رحمانالله لکنوال، هغه افغان مهاجر چې د امریکا د ملي ګارد پر غړیو د وژونکو ډزو په تور تورن شوی، د امریکا ته تر راتګ وروسته افراطي فکرونو ته مایل شوی دی.
نوموړې د «انبيسي نیوز» تلویزیون سره په ځانګړې مرکه کې ویلي چې د امنیتي ادارو لومړنۍ موندنې ښيي چې لکنوال د امریکا کې د ژوند پر مهال، او د خپلې اصلي ولایت – خوست – او افغان ټولنې سره د اړیکو له لارې، افراطي لیدلوري ته مایل شوی.
امنیتي چارواکي وایي، دوی لا هم د لکنوال له کورنۍ او نژدې کسانو څخه پوښتنې کوي، څو د پېښې نور جزئیات معلوم کړي.
د راپورونو له مخې، ۲۹ کلن لکنوال تیره چهارشنبه د امریکا پلازمېنې واشنګټن ډي سي کې، د سپینې ماڼۍ ته نږدې، دوه تنه د ملي ګارد غړي په ډزو وویشتل. په دې برید کې یو تن ووژل شو او بل ژور ټپي شوی چې روغتیایي وضعیت یې د اندېښنې وړ ښودل شوی دی.
لکنوال د افغانستان د جنوب ختیځ خوست ولایت اوسېدونکی و، او د جمهوري نظام د سقوط مخکې یې له امریکا د مرکزي استخباراتو ادارې سره کار کړی و. هغه د ۲۰۲۱ کال د اګست میاشتې وروسته، کله چې طالبان واک ته ورسېدل، د «متحدینو ته ښه راغلاست» په نوم پروګرام له لارې امریکا ته انتقال شو. دا پروګرام د هغو افغانانو لپاره جوړ شوی و چې د تېرو دوو لسیزو په اوږدو کې یې له امریکا سره همکاري کړې وه.
دغه پېښه یو ځل بیا په امریکا کې د افغان مهاجرینو د شالیدونو د څېړلو او پالولو له بهیر سره تړلې اندېښنې زیاتې کړې دي، په ځانګړې توګه د هغو افغانانو په اړه چې د طالبانو تر بیا واکمنېدو وروسته له هېواده وتلي دي.
تحلیلګران وایي، د مهاجرینو رواني او ټولنیز خلاً کولی شي هغوی افراطي ډلو ته د جذب زمینه برابره کړي.
اوس مهال لکنوال د امریکا د امنیتي ادارو له لوري تر توقیف لاندې دی او پلټنې ترې روانې دي.
