۹ کسان د نیمروز په چخانسور کې د تاریخي ځایونو د نړولو په تور نیول شوي
په نیمروز ولایت کې امنیتي ځواکونو ۹ تنه نیولي چې د طالبانو د ادارې له خوا د چخانسور ولسوالۍ اوسېدونکي دي. هغوی د یوه تاریخي ځای د ناقانونه کیندنو او ورانيو په تور نیول شوي دي.
د محلي راپورونو له مخې، دا کسان هغه مهال د طالبانو د امنیتي ځواکونو له خوا ونیول شول چې د یوه تاریخي ساحې په ناقانونه ډول په کیندنو بوخت وو. له دوی څخه دوه برقي وسایط او یو شمېر کیندلو وسایل هم د امنیتي ځواکونو لاس ته ورغلي دي.
مولوي نورالدین حمزه، چې د طالبانو له خوا د چخانسور ولسوال ټاکل شوی، دا پېښه تایید کړې او ټینګار یې کړی چې د تاریخي میراثونو د ویجاړولو هڅو ته به اجازه ورنه کړل شي.
همداراز، مفتي حبیبالله الهام، چې د طالبانو د ادارې تر چتر لاندې د نیمروز د اطلاعاتو او فرهنګ رئیس دی، ویلي چې د دې ډلې د مشر په فرمان، د تاریخي آثارو ساتنه د ټولو خلکو ګډ مسؤلیت دی او دا اداره به په دې برخه کې له هېڅ ډول سرغړونې څخه سترګې پټې نه کړي.
که څه هم طالبان ادعا کوي چې د هېواد له فرهنګ او تاریخي هویت څخه ملاتړ کوي، خو د دې ډلې پخوانۍ کړنې، لکه د بامیان د بودا مجسمو ړنګول، د دوی په ادعاوو شکونه راولاړ کړي دي. په هېواد کې د قانون نه شتون او د شفافو میکانیزمونو نشتون د فرهنګي میراثونو د غلا او ناوړه استفادې لپاره زمینه برابره کړې.
