پاکستانیو پوځیانو په اسلاماباد کې د افغان کډوالو پر مېشت ځایونو یرغل کړی
د پاکستان له خوا پر افغان کډوالو د فشارونو په دوام، د دغه هېواد پوځیانو تېره شپه د اسلاماباد ښار په «پارک ارجنټاین» سیمه کې د افغان مهاجرینو پر استوګنځایونو یرغل کړی او له ۱۵۰ زیاتې کورنۍ یې نیولې دي.
د یادو کورنیو یو شمېر غړو ویلي، سره له دې چې دوی قانوني ویزې او د استوګنې اسناد درلودل، بیا هم په زور د «کمپ حاجي» نومي لنډمهاله کمپ ته انتقال شول. دا پېښه داسې مهال شوې چې د پاکستان حکومت په دې وروستیو کې پر افغانستان د خپلو سرحدي بریدونو کچه لوړه کړې.
ظاهر بهاند، چې په اسلاماباد کې مېشت خبریال دی، تایید کړې چې پولیسو د ټول ښار په کچه پراخ عملیات پیل کړي وو. د هغه په وینا، یوازې د «پارک ارجنټاین» له سیمې شاوخوا ۲۰۰ کورنۍ په زور نیول شوي او انتقال شوې دي. دغه عملیات له مخکې خبرتیا پرته او د شپې ناوخته ترسره شوي، چې دا کار د مهاجرینو ترمنځ وېره او بېباوري نوره هم زیاته کړې.
د مهاجرو د حقونو فعالانو یو ځل بیا د پاکستان له امنیتي بنسټونو څخه د تاوتریخوالي او تبعیض پر وړاندې خپله ژوره اندېښنه څرګنده کړې. محمد خان طالبی احمدزی، د دغو فعالانو له ډلې، له پاکستاني حکومت څخه غوښتي چې د سختدریځي اقدام پر ځای، له منطقي او بشري چلند څخه کار واخلي او د کډوالو اخراج هغه وخت ته وځنډوي چې لازم شرایط برابر شي.
په داسې حال کې چې زرګونه افغان کډوال د امنیتي ګواښونو او د طالبانو د رژیم له امله هېواد پرېښی، د پاکستان وروستي اقدامات پر هغوی اضافي فشارونه اچولي او دا حالت د بشري حقونو د نړیوالو ملاتړو بنسټونو لپاره د عاجلې مداخلې اړتیا لا زیاتوي.
