د اسرایلو وزیر د قطر پر ضد وروستی برید «سم اقدام» وباله
د اسرایلي چارواکو د نوې څرګندونې له مخې، د دې رژيم د کډوالو وزير عمیخای شیکلی د قطر پر ضد وروستی برید «سم اقدام» بللی او د دوحې په کوربهتوب د حماس د مشرانو د ترور هڅو ملاتړ کړی دی؛ هغه څرګندونې چې پراخ غبرګونونه یې راپارولي دي.
د عربي رسنيو د راپورونو له مخې، شیکلی د سه شنبې ماښام له عبري راډيو ۱۰۳FM سره په مرکه کې پر قطر سختې نيوکې کړې او دغه هېواد یې د «اخوانالمسلمین پلازمېنه» او «په خبرو اترو کې ناعادل منځګړی» بللی دی. نوموړي ادعا کړې چې د قطر رول د بنديانو د تبادلې په پروسه کې ځنډ رامنځته کړی دی.
دغه اسرایلي وزير ټينګار کړی چې تلابیب په خپل وروستي پوځي اقدام کې دننه د قطر په خاوره «سم عمل» ترسره کړی او زياته کړې یې ده چې له دوحې سره چلند بايد پر همدې بنسټ روان وي؛ دا دریځ په څرګنده د اسرایل له رسمي پالیسۍ سره په ټکر کې دی.
دا څرګندونې په داسې حال کې شوې دي چې د اسرایل پوځ د سپتمبر نهمې په ورځ د دوحې ښار باندې هوايي برید کړی و؛ برید چې د يوه قطري امنيتي ځواک د وژل کېدو او د څو نورو کسانو، په شمول د حماس د مشرانو د دفتر د غړو، د مړینې سبب شو. قطر دغه اقدام د خپلې ملي حاکميت ښکاره سرغړونه بللې او ویلي یې دي چې د ځواب ورکولو حق ځان ته ساتي.
له دې پېښې وروسته، د سپتمبر په ۲۹مه، د اسرایل صدراعظم بنيامين نتنياهو د قطر له صدراعظم سره په ټيليفوني تماس کې، د امريکا د ولسمشر ډونالډ ټرمپ په شتون کې، د قطر پر حاکميت د تېري او د دې هېواد د امنيتي ځواک د وژل کېدو له امله بښنه وغوښته.
د اسرایل دا برید د عرب او نړيوالې کچې پراخو محکوميتونو سره مخ شو او ګڼو هېوادونو او نهادونو دا کار د نړيوالو قوانينو او اصولو خلاف وباله.
